Xornadas Internacionais de Estudos Transatlánticos
Lugar: Museo de Pontevedra
Datas: do 8 ao 10 de xullo de 2025
Sesión: “Facedoras sobre o mar: Galicia transatlántica” (xoves, 10 de xullo de 2025)
As mulleres desenvolveron un papel fundamental nas relacións culturais producidas entre España e América Latina ao longo do século xx. Con todo, as conexións e reciprocidades culturais tecidas a través do espazo transatlántico foron estudadas principalmente no ámbito masculino. Máis aínda, o estudo da traxectoria de artistas, intelectuais e xestoras culturais é a miúdo abordado desde perspectivas nacionais e ámbitos disciplinarios pechados.
As Xornadas Internacionais de Estudos Transatlánticos están organizadas conxuntamente polo Museo de Pontevedra e o proxecto de investigación I+D+i “Facedoras de cultura: conexións e intercambios artísticos transatlánticos no século xx”, (PID2022-142633OA-I00), financiado polo Ministerio de Ciencia, Innovación e Universidades de España, a Axencia Estatal de Investigación e os fondos FEDER. Nelas abordaranse en profundidade un panorama amplo e variado de traxectorias de mulleres nas artes en España e Latinoamérica durante o século xx, con especial interese en disciplinas visuais e sonoras. O programa das xornadas articúlase a través de tres liñas temáticas: o espazo transatlántico como contorna de mobilidade e intercambio durante o século xx, con énfase nos países menos estudados; a experiencia creativa de mulleres vinculadas a Galicia; e a valoración de producións de artesanía ou prácticas artísticas en soportes non convencionais. Interésanos ademais resaltar a noción de encontros entre distintas disciplinas, correntes migratorias ou dinámicas de intercambio cultural.
Nesta sesión, que terá lugar o xoves 10 de xullo de 2025, convidamos a estudantes, investigadoras e investigadores emerxentes a presentar contribucións que visibilicen a experiencia creativa de mulleres na contorna transatlántico galega ao longo do século xx. Na sesión expoñerase un compendio de investigacións en curso, con contribucións de 10 minutos cada unha. Esta convocatoria está aberta tanto aos colectivos antes sinalados vinculados a institucións galegas ou doutras latitudes dentro e fóra de España coma a aquelas que se dediquen a proxectos científicos ou creativos de maneira independente. As propostas poden apuntar a unha ampla gama de contornas creativas, incluíndo as artes visuais, gráficas, sonoras ou téxtiles, creación de artesanías e a xestión cultural desde perspectivas historiográficas, sociolóxicas ou creativas. A participación neste encontro ofrece a posibilidade de recibir as impresións do grupo de investigación do proxecto “Facedoras de cultura ”. Os relatorios seleccionados poderán presentarse en español ou galego.
Data límite para presentar propostas: amplíase ata o 31 de maio de 2025.
Para participar débese enviar un resumo (dun máximo de 300 palabras) e unha breve biografía (máximo de 100 palabras) a infoarteygenero@cchs.csic.es.
Coordinación científica:
Carmen Gaitán Salinas. CSIC, Instituto de Historia
Michel Otayek. Freie Universität Berlin, ZI Lateinamerika-Institut
Diana Duo Ramila. Museo de Pontevedra
Comité científico:
Ester Alba Pagán. Universitat de València
Rodrigo Gutierrez Viñuales. Universidad de Granada
Sol Izquierdo de la Viña. Universidad Complutense de Madrid
Alejandra Rosenberg. Brown University
Pilar Serrano Betored. Universidad Autónoma de Madrid
Ute Seydel. Universidad Nacional Autónoma de México
Museo de Pontevedra
