SOMBRAS ATLÁNTICAS. RETRATOS DA ARTE GALEGA

FOTOGRAFÍAS DE ANXO CABADA
Datas: 04/11/2022 - 15/01/2023
Localización: Edificio Castelao

A exposición reúne retratos en branco e negro de 34 artistas de distintas xeracións, modalidades artísticas e territorios, todas e todos con nacemento ou residencia en Galicia. As fotografías foron tomadas co mesmo pano de fondo, como un escenario teatral que homenaxea aos primeiros fotógrafos e que serve para dar coherencia ao conxunto de imaxes da exposición, que se relacionan entre si.

Aquí atopamos creadores que despuntaron nos 70, como Silverio Rivas, Jorge Castillo, Acisclo Manzano ou Buciños, e aos que pertenceron ou se vincularon ao grupo Atlántica, que na década dos 80 contribuíu a reactivar as artes plásticas en Galicia e darlles presenza no exterior: Menchu Lamas, Antón Lamazares, Antón Patiño, Ánxel Huete, Xosé Freixanes, Xabier Correa Corredoira, Ignacio Basallo, Din Matamoro... Tamén aos continuadores da renovación da escultura galega, como Francisco Leiro, Soledad Penalta ou Manolo Paz.

Naquelas xeracións a visibilidade de mulleres artistas era reducida, algo que cambiou nas últimas décadas e que queda ben reflectido nesta mostra, na que case a metade dos retratos son de mulleres artistas, como Almudena Fernández Fariña, Mónica Alonso, Carme Nogueira, Pamen Pereira, Tatiana Medal, Lula Goce, Elena Fernández Prada ou Sula Repani.

Anxo Cabada, fotógrafo e profesor, é natural de Sabucedo (A Estrada). Leva catro décadas fotografando o territorio galego en proxectos nos que abordou diferentes temáticas como, entre outras, o mar en ‘Mareagrafías’ (2005), a terra en ‘Terragrafías’ (2009) e as vilas galegas en ‘Vilagrafías’ (2012), unha proposta literario-fotográfica. En ‘O imaxinario do país’ (2018) Cabada retratou as escritoras e escritores galegos, un proxecto que precedeu este “Sombras atlánticas’, centrado agora nos e nas que crean a beleza, os e as artistas.


Obradoiros de retrato fotográfico

O obxectivo é que as persoas participantes obteñan un método de traballo efectivo para retratar de maneira resolutiva e co menor equipo posible, aproveitando ao máximo a luz dispoñible.

O obradoiro ten unha duración de catro horas, con dúas partes: na primeira, trabállase de maneira práctica para explicar un método conciso e útil cun equipo mínimo: composición, comprensión da luz, dirección e interacción co retratado.... Na segunda parte visualízase e analízase o cartafol realizado, para afianzar un método de traballo rápido, cómodo e eficaz.

A inscrición aos obradoiros pode facerse a través do correo electrónico reservas.museo@depo.gal. Hai dez prazas dispoñibles para cada obradoiro, dirixidas a público adulto e menores a partir de 12 anos.

De impartir os obradoiros encárgase Luis Pereira, fotógrafo de Cesantes con máis de 20 anos de experiencia. Iniciouse na fotografía de maneira autodidacta, completando a formación en talleres con grandes profesionais da fotografía. Participou en varias exposicións colectivas en lugares como Madrid, Vigo, A Coruña ou París e publicou tres libros: ‘Luis Pereira’ (2018), ‘Seremos un frágil recuerdo’ (2020) e ‘Sobre lo esencial’ (2022).

Estes obradoiros forman parte das actividades complementarias á exposición ‘Sombras atlánticas. Retratos da arte galega’.

Xaquín Chaves
Rut Massó