Museo de Pontevedra

Unha sala do Museo de Pontevedra. Óleo sobre cartón, 1929. Antonio Palacios Ramilo (1874-1945)

Este ano 2024 cómprense 150 anos do nacemento no Porriño de Antonio Palacios. A condición de Palacios como gran figura protagonista na renovación do panorama da arquitectura española do primeiro terzo do século XX motiva a organización deste simposio de especialistas para reivindicar a vixencia da súa obra e dun legado repartido principalmente entre Galicia e Madrid. 

O simposio achega diferentes visións actualizadas de expertos na obra de Antonio Palacios, incluíndo algúns dos estudosos que desde os anos oitenta do século XX veñen chamando a atención sobre a modernidade e leccións da boa arquitectura materializadas polo porriñés. Tamén integran o programa do simposio as colaboracións de especialistas no contexto arquitectónico internacional e nacional, nas artes que completaron a calidade estética dos seus edificios, desde a escultura ata a cerámica, ou nas conexións vitais e profesionais que foi tecendo con diferentes lugares da súa andaina vital.

As mesas redondas que pecharán cada xornada abrirán ademais a posibilidade de achegar outras miradas máis plurais á obra de Antonio Palacios a cargo de arquitectos, historiadores, responsables de museos e comisarios de exposicións. Desde o papel pioneiro que tivo na aplicación do granito das canteiras do Porriño ata o interese pola conservación do patrimonio histórico, pasando pola integración da arquitectura nas paisaxes urbanas e rurais, estas outras valoracións da súa obra serán obxecto de diálogo entre os convidados.

Deste xeito, a través das contribucións reunidas nos relatorios e mesas redondas, será posible transmitir ao público as liñas principais do ambiente arquitectónico que rodeou a Antonio Palacios, revisar o catálogo de obras que integran a súa produción, completar a panorámica das súas colaboracións con outros artistas, e valorar máis xustamente o legado dos edificios construídos ou proxectados, a aportación que fixeron na arquitectura e no patrimonio do país.

Atopándose na provincia de Pontevedra a maioría dos edificios que deseñou para Galicia, as xornadas do simposio pecharán o sábado 6 de abril cunha visita guiada ás obras repartidas por Vigo, Nigrán, Baiona, O Porriño e Mondariz-Balenario.

Cómpre recordar, finalmente, que Antonio Palacios estudou bacharelato en Pontevedra e mantivo contacto con sobranceiros membros vencellados coa orixe e desenvolvemento do Museo de Pontevedra, como foron Casto Sampedro ou Francisco Javier Sánchez Cantón, sen esquecer a amizade con Alfonso Daniel R. Castelao. Na colección do Museo consérvanse, xunto a algún dos seus planos, significativos exemplos da súa produción como pintor, entre eles (ademais de dous retratos femininos ao óleo sobre tea, procedentes do legado do seu amigo o caricaturista Sileno), a primeira imaxe dunha das salas do edificio Castro Monteagudo, que Antonio Palacios pintou do natural o 28 de agosto de 1929 no Museo de Pontevedra, que acababa de inaugurarse. Este feito reafirma a pertinencia de que sexa este Museo o que acolla este encontro e conmemoración dunha figura fundamental da arquitectura e da cultura de comezos do século XX.

Actividade recoñecida para ser imputada cunha equivalencia de 1 ECTS nos estudos de grao en Historia, Historia da Arte e Xeografía e Ordenación do Territorio na Universidade de Santiago de Compostela.

PROGRAMA

Organiza: Museo de Pontevedra e Grupo de investigación IDEAHS (GI-1510)​, Universidade de Santiago de Compostela

Dirixen: Jesús Ángel Sánchez, catedrático de Historia da Arte, Universidade de Santiago de Compostela, e Álvaro Bonet, arquitecto, Universidad Politécnica de Madrid

Coordina: Agar Ledo Arias, Museo de Pontevedra

Apoia a coordinación na saída do sábado 6 de abril: Aldana Fernández Cambas, Universidade de Santiago de Compostela

Vídeos