Museo de Pontevedra

XII Encontro de Conservación e Restauración. Museos sostibles? Xestión, museografía e conservación

23 e 24 de novembro de 2023

Os cambios aos que se enfronta a institución museística, inmersa nun proceso de reflexión e debate crítico para adaptarse ás necesidades actuais, supoñen unha revisión dos procedementos e protocolos de acordo cos obxectivos marcados pola Axenda 2030 de desenvolvemento sostible aprobada pola ONU en 2015. A sostibilidade, eixo principal e transversal das accións foi, tamén, o tema elixido polo Consello Internacional de Museos (ICOM) para celebrar o día dos Museos de 2023.

Seguindo esta liña, o XII Encontro de Conservación e Restauración do Museo de Pontevedra e a Escola de Conservación e Restauración de Bens Culturais de Galicia abordará o tema ‘Museos sostibles? Xestión, museografía e conservación’, coa sostibilidade como un punto de partida, de non retorno, e co obxectivo de conseguir que o museo sexa unha comunidade resiliente comprometida coa sociedade e concienciada cos valores patrimoniais. A reflexión sobre os museos e a sostibilidade é un dos retos máis urxentes dentro da práctica museística desde o compromiso social, a rexeneración económica e a responsabilidade ecolóxica. Un tema controvertido que parte de moi bos desexos, pero cales foron, ata o momento, os resultados?

Este encontro preséntase, nun primeiro bloque, como un foro de análise e propostas para o intercambio de experiencias e iniciativas de institucións públicas e privadas para establecer estratexias e criterios de sostibilidade na xestión do patrimonio cultural. Na segunda sesión prestarase atención ás prácticas museolóxicas e museográficas responsables, abordando a concienciación na rehabilitación arquitectónica, o cálculo da pegada de carbono, eficiencia enerxética, iluminación ou optimización de recursos na produción e deseño de exposicións. Finalmente, nun último bloque, máis específico, tratarase a sostibilidade no ámbito da conservación e restauración, promovendo comportamentos e prácticas que minimicen a pegada de carbono, expondo recursos tecnolóxicos como medida de conservación sostible, utilizando metodoloxías verdes e procedementos rendibles en accións conservativas e atendendo a programas de mantemento e xestión de residuos.

Dirixido a

Orientado a profesionais do ámbito da museoloxía. Aberto a estudantes de disciplinas relacionadas co tema do encontro: conservación e restauración, historia, historia da arte…   

Formato

Presencial. Rexistraranse as intervencións para poñelas a disposición das persoas interesadas no sitio web do encontro.

Comité científico

Susana Ara Poceiro (Escola Superior de Conservación e Restauración de Bens Culturais de Galicia)

Sonia Briones Vázquez (Museo de Pontevedra)

Andrea Fernández Arcos (Escola Superior de Conservación e Restauración de Bens Culturais de Galicia)

Carmen Lorenzo Rivera (Escola Superior de Conservación e Restauración de Bens Culturais de Galicia)

Pablo Porral Vicente (Escola Superior de Conservación e Restauración de Bens Culturais de Galicia)

Óscar Taboada Romero (Museo de Pontevedra)

Aránzazu Vaquero González (Museo de Pontevedra)

Coordinación/secretaría técnica:

Agar Ledo Arias (Museo de Pontevedra)

Comunicación: 

Moisés Álvarez Jorge (Museo de Pontevedra)

Organiza

Museo de Pontevedra coa colaboración da Escola Superior de Conservación e Restauración de Bens Culturais de Galicia

PROGRAMA

Programa XII Encontro (pdf)

GRAVACIÓNS EN VÍDEO

https://www.youtube.com/watch?v=8fr4HtCbSnA&list=PLI8kT8CUmE5lTUb7LbKAf1NsRi97eiYKQ